Felly, mae’r Meistr ei hun yn mynd i roi arwydd i chi! Edrychwch, bydd y ferch ifanc yn feichiog, ac yn cael mab – a bydd y plentyn yn cael ei alw yn Emaniwel.
1 Ond fydd y tywyllwch ddim yn para
i’r tir aeth drwy’r fath argyfwng!
Y tro cyntaf, cafodd tir Sabulon
a thir Nafftali eu cywilyddio;
ond yn y dyfodol bydd Duw
yn dod ag anrhydedd i Galilea’r Cenhedloedd,
ar Ffordd y Môr,
a’r ardal yr ochr arall i afon Iorddonen.
2 Mae’r bobl oedd yn byw yn y tywyllwch
wedi gweld golau llachar.
Mae golau wedi gwawrio
ar y rhai oedd yn byw dan gysgod marwolaeth.
a’i gwneud yn hapus iawn;
maen nhw’n dathlu o dy flaen di
fel ffermwyr adeg y cynhaeaf,
neu filwyr yn cael sbri wrth rannu’r ysbail.
4 Achos rwyt ti wedi torri’r iau
oedd yn faich arnyn nhw,
a’r ffon oedd yn curo’u cefnau nhw
– sef gwialen y meistr gwaith –
fel y gwnest ti bryd hynny yn Midian.
5 Bydd yr esgidiau fu’n sathru maes y gâd,
a’r gwisgoedd gafodd eu rholio mewn gwaed,
yn cael eu taflu i’r fflamau i’w llosgi.
6 Achos mae plentyn wedi cael ei eni i ni,
mab wedi cael ei roi i ni.
Bydd e’n cael y cyfrifoldeb o lywodraethu.
A bydd yn cael ei alw yn
Strategydd rhyfeddol, y Duw arwrol,
Tad yr oesoedd, Tywysog heddwch.
7 Fydd ei lywodraeth ddim yn stopio tyfu,
a bydd yn dod â llwyddiant di-ben-draw
i orsedd Dafydd a’i deyrnas.
Bydd yn ei sefydlu a’i chryfhau
a theyrnasu’n gyfiawn ac yn deg
o hyn allan, ac am byth.
Mae’r ARGLWYDD hollbwerus yn benderfynol
o wneud hyn i gyd.
Mae’n bwysig cofio mai cynllun Duw o’r cychwyn oedd anfon Iesu Grist i’r byd. Mae’r Hen
Destament cyfan yn pwyntio at enedigaeth Iesu. Yn ein darlleniad ni heddiw, mae Eseia – oedd
yn ddyn oedd yn byw 800 mlynedd cyn i Iesu gael ei eni – yn dweud y byddai Duw, rhyw ddydd,
yn anfon Brenin arbennig iawn i’r byd.
Cwestiwn 1
Ystyr ‘Immanuel’ yw ‘Duw gyda ni’. Sut mae’r adnod (Eseia 7:14) yn dod yn wir pan fo Iesu yn cael ei eni?
Cwestiwn 2
Mae’r geiriau hyn yn disgrifio Iesu mor berffaith – sut mae Eseia’n disgrifio’r ‘bachgen’ sy’n mynd i gael ei eni yn y dyfodol?
Cwestiwn 3
Pam fod y ‘bachgen’ hwn yn mynd i ddod i’r byd? Sut mae’n mynd i fendithio pobl Dduw?
Cwestiwn 4
Ydi’r adnodau hyn yn dy helpu i ryfeddu ar Iesu Grist heddiw?
Gweddïo: Diolch, Arglwydd, dy fod wedi addo anfon Iesu i’r byd o’r cychwyn! Diolch fod y Beibl cyfan yn pwyntio at ei ddyfodiad. Diolch mai Iesu yw’r bachgen’ yn Eseia sy’n mynd i ddod â ‘goleuni’ i’r byd!
