Dydd Sadwrn 21 Rhagfyr

³¹ “Mae’r amser yn dod,” meddai’r ARGLWYDD, “pan fydda i’n gwneud ymrwymiad newydd gyda phobl Israel a Jwda. ³² Fydd hwn ddim yr un fath â’r un wnes i gyda’u hynafiaid (pan afaelais yn eu llaw a’u harwain allan o’r Aifft). Roedden nhw wedi torri amodau’r ymrwymiad hwnnw, er fy mod i wedi bod yn ŵr ffyddlon iddyn nhw. ³³ Dyma’r ymrwymiad fydda i’n ei wneud gyda phobl Israel bryd hynny,” meddai’r ARGLWYDD: “Bydda i’n rhoi fy nghyfraith yn eu calonnau nhw, ac yn ei hysgrifennu ar eu meddyliau nhw. Fi fydd eu Duw nhw, a nhw fydd fy mhobl i. ³⁴ Fyddan nhw ddim yn gorfod dysgu pobl eraill, a dweud wrth ei gilydd, ‘Rhaid i ti ddod i nabod yr ARGLWYDD’. Byddan nhw i gyd yn fy nabod i, y bobl gyffredin a’r arweinwyr, am fy mod i’n maddau iddyn nhw am y pethau wnaethon nhw o’i le, ac yn anghofio’u pechodau am byth.”

³⁵ Dyma mae’r ARGLWYDD yn ei ddweud –

yr un sydd wedi gosod trefn i’r haul roi golau’n y dydd

a’r lleuad a’r sêr roi eu golau’n y nos,^Croes

yr un sy’n corddi’r môr yn donnau mawr –

yr ARGLWYDD hollbwerus ydy ei enw e:

³⁶ “Byddai dileu pobl Israel fel cenedl

yr un fath â chael gwared â threfn natur!”

³⁷ Dyma mae’r ARGLWYDD yn ei ddweud:

“Mae’n amhosib mesur yr awyr a’r gofod,

neu archwilio sylfeini’r ddaear.

Mae’r un mor amhosib i mi wrthod pobl Israel

am bopeth drwg maen nhw wedi’i wneud,”

—yr ARGLWYDD sy’n dweud hyn.

³⁸ “Mae’r amser yn dod,” meddai’r ARGLWYDD, “pan fydd dinas Jerwsalem yn cael ei hadeiladu i mi eto, o Dŵr Chanan-el i Giât y Gornel. ³⁹ Bydd ei ffiniau’n ymestyn i’r gorllewin at Fryn Gareb ac yna’n troi i’r de i lawr i Goath. ⁴⁰ Bydd hyd yn oed y dyffryn lle cafodd yr holl gyrff marw a’u lludw eu taflu, a’r holl gaeau i lawr at Ddyffryn Cidron yn y dwyrain at gornel Giât y Ceffylau, yn rhan o’r ddinas fydd wedi’i chysegru i’r ARGLWYDD. Fydd y ddinas ddim yn cael ei chwynnu na’i bwrw i lawr byth eto.”